شكد جبيره
من يحب انسان واحد
بس حبيبه اختار غيره
شكد جبيره
من يضكك عوز وانته بنص شماته
تدوخ المن وجهك بجوعك تديره
شكد جبيره
من تشوف انته بأشاره
طفلك يبيع الجرايد
وانته شاعر بدل اشعاره بحصيره
تختنك وانته بنص برودك
ترتجل كلمه غريبه
ياللهي
الثروه في أرضي فقيره
نفط دمي كباله صاير
نخل لكن موضماير
داست التمره وضميره
نعم جرحي من بلادي
وصوجي انه ماعرفت اختار غيره
شكد عشكته
شكد بجيت بغربتي انه لتربته
ومن وصلته
كلي ارحل عوف دارك شوف ديره
ماكرهته
من اخوي انفقد مني بنص عصابه
ولسه ماأعرف مصيره
ماصرت روجه واخذني
ولافتن لوثتلي فكري
وهذا يكفي وافتخر
من وكفت كبال طلقه وبيدي طيره
شكد جبيره
من تحس بموقفك يسوى دفاتر
وانته عاجز
تقتصدلك ربع ليره
شكد جبيره
من تحاول تطوي صفحه
وتكتشف هي الاخيره
تحن بعده تريد ترجع
فات اوانك
بس بقت روحك أسيره
كبال عتبه
كبال ذكرى
ونظره مومن عين طلعت
جنهه نظره بعين كلبه
وجي حبيبك مانسيته
رغم كلشي لهسه بدموعك تحبه
وماتحاول تلكه غيره تدري حيره
شكد جبيره
من تحس كلشي بحياتك صار ضدك
حتى كلبك
عافك لخاطر ظفيره
شكد جبيره
تموت وانته بلاحبايب ويدفن احساسك ندم
شكد جبيره
تحس حياتك كلهه جانت من عدم
شكد جبيره
ذاك رفضك واحتجاجك يرضخ لكلمة نعم
تموت وحدك ترفض ادفنك عشيره
شكد جبيره
من تموت بلاعشيره
وانته شاعر
تدري بعيونك بصيرك
وايدك لمتنك كصيره
شكد جبيره
تخسر احلامك اميره
شكد جبيره
وكلهن يطول حجيهن
والخساير ويلي ويلي
شكد جبيره
